UGT, ante o 40 Aniversario da Constitución Española
A Confederación Sindical Unión Xeral de Traballadores, ante a
celebración do 40 Aniversario da Constitución Española, considera
imprescindible lembrar que hai mandatos constitucionais cuxo pleno
desenvolvemento foi relegado durante anos e sen os cales non se poden
entender ao noso país como o Estado Social que proclama a propia
Constitución. O sindicato considera que o marco constitucional aprobado
pola cidadanía en 1978 fixo posible o noso crecemento en paz e
liberdade, así como afrontar os grandes problemas vividos nestes anos
como as ameazas involucionistas, o terrorismo ou as
tensións territoriais, pero sería un erro centrarnos na compracencia ou
en debates sobre posibles reformas –seguramente convenientes- que unha
vez máis relegasen do debate público o que está pendente.
- O Título Primeiro da Constitución recolle dereitos e deberes fundamentais como o dereito de reunión pacífica (artigo 21.1), o dereito de folga dos traballadores para a defensa dos seus intereses (artigo 28.2), o deber de traballar e o dereito ao traballo (artigo 35.1), o deber de todos de contribuír ao sostemento dos gastos públicos nun sistema tributario xusto (artigo 31.1), o dereito á negociación colectiva entre os representantes dos traballadores e os empresarios e a forza vinculante dos convenios colectivos (artigo 37.1), o deber dos poderes públicos de promover unha distribución da renda rexional e persoal máis equitativa (artigo 40), o dereito de todos os españois a gozar dunha vivenda digna e adecuada (artigo 47), ou a obrigación dos poderes públicos de garantir pensións adecuadas e periodicamente actualizadas (artigo 50).
Todos eses dereitos, liberdades e obrigacións (e algúns outros como o
dereito á liberdade de expresión e a recibir información veraz) foron
relegados, recortados ou directamente criminalizados na
práctica política destes anos, con maior intensidade durante a gran
crise económica. A forza vinculante deses artigos é a mesma que a do
resto de preceptos constitucionais, non son expresións utópicas senón
preceptos coa mesma forza legal que os demais, e condicionáronse coa espuria e vergonzante reforma do artigo 135 realizada en 2011 e nunca apoiada expresamente pola cidadanía.
Derrogar a reforma do 135.
