UGT e CCOO denuncian o nulo compromiso do Goberno para erradicar a discriminación e a violencia contra as mulleres
As confederacións sindicais Unión General de Traballadores e Comisións
Obreiras convocarán paros simbólicos o vindeiro mércores, 8 de Marzo, Día
Internacional da Muller Traballadora, para denunciar o nulo compromiso político
do Goberno para erradicar a violencia contra as mulleres, así como a
desigualdade e discriminación que padecen no ámbito laboral. Secundan así as
accións, concentracións e mobilizacións convocadas polo Movemento Internacional
das Mulleres 8 de marzo.
Os paros, de entre cinco e dez minutos,
convocaranse ás 12:00 horas do 8 de Marzo, nas sedes de ambos os sindicatos
para esixir ao Goberno actuacións contra a situación de discriminación e
violencia que sofren as mulleres, e para reforzar o compromiso sindical coa
eliminación da desigualdade laboral. Así mesmo, ambas as organizacións secundan
as accións, concentracións e mobilizacións convocadas polo movemento internacional
das mulleres 8 Marzo cos mesmos obxectivos e reivindicacións.
CCOO e UGT consideran que a igualdade é
un dereito fundamental cuxo cumprimento non será posible alcanzar sen unha
vontade política real dirixida a este fin. Por esa razón, esixen ao Goberno e
ao conxunto da clase política española que prioricen nas súas axendas as
políticas de igualdade con medidas como:
- Impulsar o Dialogo Social e a Negociación Colectiva para a adopción efectiva de medidas de igualdade no emprego das mulleres, a eliminación de todas as brechas de xénero e a violencia contra as mulleres.
- Reverter as regresivas reformas e recortes levados a cabo durante a anterior lexislatura e adoptar novas medidas, sendo prioritaria a consecución dun Pacto de Estado contra a Violencia de Xénero, a elaboración e posta en marcha dunha Lei de Igualdade Salarial, así como un mellor desenvolvemento da normativa de igualdade que sirva de forma real ao logro da eliminación da discriminación e desigualdade das mulleres no acceso ao emprego, o seu mantemento e promoción, e que contribúa de forma decisiva a mellorar a calidade no emprego das mulleres.
- Avanzar en políticas de conciliación e corresponsabilidade entre mulleres e homes, de forma que o custo social e laboral dos coidados de menores e maiores non recaia exclusivamente sobre as mulleres.
Este 8 de Marzo de 2017, UGT e CCOO,
renovaremos o noso compromiso coas políticas de igualdade denunciando a
situación de retroceso que estamos a vivir en ambas as áreas, o agravamento da
violencia machista, a precariedade laboral e económica da poboación
traballadora con forte impacto sobre as mulleres e en especial dos grupos máis
vulnerables e discriminados, reivindicando e impulsando a erradicación da
violencia de xénero, a mellora das condicións laborais e a eliminación das
brechas de xénero no emprego e na protección social.
Esiximos ao Goberno español a
ratificación do Convenio 189 da OIT sobre as traballadoras e traballadores
domésticos, así como a aplicación do Convenio do Consello de Europa (Istambul
2011) sobre prevención e loita contra a violencia sobre as mulleres.
* Noticias Relacionadas: