Mobilizacións en toda Galicia para esixir o desbloqueo do Fogasa
UGT e CCOO de Galicia convocaron
concentracións hoxe diante das oficinas do Fondo de Garantía Salarial
(FOGASA) para denunciar o atraso que este organismo acumula nos
pagamentos. As protestas tiveron lugar en A Coruña, Lugo, Ourense e
Vigo. No resto do Estado tamén houbo accións reivindicativas, xa que o
FOGASA acumula máis de 180.000 expedientes sen resolver alén do prazo
máximo de tres meses que marca o seu propio regulamento.
|
|
Santiago, 13 de febreiro de 2014.- UGT e CCOO de Galicia convocaron concentracións hoxe diante das oficinas do Fondo de Garantía Salarial (FOGASA) para denunciar o atraso que este organismo acumula nos pagamentos. As protestas tiveron lugar en A Coruña, Lugo, Ourense e Vigo. No resto do Estado tamén houbo accións reivindicativas, xa que o FOGASA acumula máis de 180.000 expedientes sen resolver alén do prazo máximo de tres meses que marca o seu propio regulamento.
CCOO e UGT lembran que a misión fundamental do FOGASA é pagarlles aos
traballadores e traballadoras por conta allea parte dos créditos
salariais e indemnizacións pendentes de pagamento, tanto por declaración
de insolvencia como por concurso de acredores.
A crise incrementou o recurso a este fondo, que entre o 2007 e o 2013
case multiplicou por catro o número de expedientes resoltos, superando
os 150.000. Con todo, como xa se indicou, na actualidade ten máis de
180.000 que, máis de tres meses despois do prazo máximo, continúan sen
resolución.
Para solucionar o problema, o Ministerio de Economía e Seguridade
Social externalizou parte da xestión dos expedientes á empresa
TRAGSATEC. Lonxe de dar resposta, UGT e CCOO denuncian que a medida
provocou situacións de inxustiza e discriminación para as persoas que
deberían percibir os pagamentos, polo que consideran que se agravou esta
realidade.
Fronte a isto, CCOO e UGT propoñen un plan de choque cuxo primeiro
eixe de actuación é o reforzamento do cadro de persoal do FOGASA para
axilizar a tramitación dos expedientes e facer efectivos os pagamentos,
dándolles prioridade aos expedientes con maior atraso —nalgún caso, ata
dous anos.
