En Galicia a taxa de temporalidade xa é do 27,2 por cento, fronte ao 26,8 por cento do resto do Estado, e esta medra en relación ao mesmo trimestre do ano anterior en 1,4 puntos, xa que hai un ano esta era do 25,8 por cento. Ademais, UGT denuncia que ascenden outras formas de subemprego.
Por outro lado, a parcialidade involuntaria xa é dun 61,8 por cento.
É dicir, de cada cen ocupados que hai en Galicia a tempo parcial,
case 62 desexarían facelo a tempo completo.
Ademais, persiste a precariedade no desemprego con 116.700 persoas
que levan máis dun ano no paro pero é que a gran maioría, 85.600,
levan dous ou máis anos nesta situación. A isto se lle engaden
68.500 vivendas con todos os activos no paro e 35.800 sen perceptores
de ingresos.
Valores insostibles, sobre todo, se se compararan cos que se
rexistraban no terceiro trimestre de 2009, 44.800 vivendas con todos
os activos no paro e 19.700 fogares sen ingresos. Isto vai parello a
taxas de cobertura baixo mínimos e unhas políticas de emprego que
non son efectivas á hora de mellorar a empregabilidade das persoas,
especialmente a dos parados de longa duración.
Hai que salientar que a evolución destas cifras é a propia do
segundo trimestre do ano polo efecto das contratacións estivais.
Agora ben, de xeito estrutural constátase a persistencia da
diminución da poboación de 16 ou máis anos, no ano 5.600 menos,
deste total, 2.000 menores de 25 anos. É dicir, cada vez hai menos
poboación en idade de traballar, un mercado laboral cada mes que
pasa máis contraído.
