UGT alerta que tan só 122.330 desempregados cobran
prestación en Galicia e, deles, 68.695 ou un subsidio ou a renda activa
con contías mínimas
Os datos de paro rexistrado feitos
públicos hoxe obrigan a rebaixar as previsións triunfalistas dos
gobernos, tanto o central como o galego, no referente ao mercado laboral
e evidencian que aínda son moitos os problemas que se rexistran e que o
desemprego segue a ser a gran lacra que ten que solucionar este país.
Ademais de que se incrementasen o número de persoas paradas neste último
mes, as taxas de cobertura continúan descendendo, cada vez son máis os
que xa non teñen dereito a unha prestación contributiva e pasan a cobrar
subsidios ou a renda activa de inserción, ambas con contías mínimas
para subsistir, o que está a provocar que sexan xa moitas as familias
que cruzan o umbral cara a exclusión social.
O desemprego increméntase en Galicia en
case 6.000 persoas. UGT xa reiterou que o último trimestre do ano sería
a radiografía real do mercado laboral
Cada vez son máis as familias que cruzan o umbral cara a exclusión social e a pobreza
Santiago,
4 de novembro de 2014.- Os datos de paro rexistrado feitos públicos
hoxe obrigan a rebaixar as previsións triunfalistas dos gobernos, tanto o
central como o galego, no referente ao mercado laboral e evidencian que
aínda son moitos os problemas que se rexistran e que o desemprego segue
a ser a gran lacra que ten que solucionar este país. Ademais de que se
incrementasen o número de persoas paradas neste último mes, as taxas de
cobertura continúan descendendo, cada vez son máis os que xa non teñen
dereito a unha prestación contributiva e pasan a cobrar subsidios ou a
renda activa de inserción, ambas con contías mínimas para subsistir, o
que está a provocar que sexan xa moitas as familias que cruzan o umbral
cara a exclusión social.
Fronte
a isto, o Goberno da Xunta pon enriba da mesa un proxecto de Orzamentos
para a Comunidade para o 2015 que recollen contías claramente
insuficientes en materia de políticas activas para intentar resolver ou
contribuír a mellorar a actual conxuntura.
UGT-Galicia
insiste en que, dentro do marco do diálogo social aberto o pasado 29 de
xullo entre o Goberno, sindicatos e empresarios, urxe un acordo que
garanta unha mínima cobertura para aquelas persoas en situación de
desemprego que xa agotaron todas as prestacións e están nunha difícil
situación, sobre todo, os parados de longa duración. Lembrar que en
Galicia xa hai máis de 150.000 desempregados que levan máis dun ano
nesta situación pero é que 105.200 xa superan os dous anos.
Neste
contexto, hai que lembrar que só en Galicia o aforro en prestacións por
desemprego superará a finais de ano os 300 millóns de euros. Froito
desta situación, precisamente, das situacións de cronificación de
desemprego para moitas persoas que os exclúe progresivamente do sistema
de prestacións. Esta cantidade debería retornar para dar ingresos
suficientes ás familias e investir en políticas activas de emprego.
Continuando
coa análise dos datos, estes indican que no mes de outubro
rexistráronse en Galicia 244.044 desempregados, aumentando en 5.841
persoas en relación ao mes anterior, o que supón un 2,45 por cento máis.
No conxunto do Estado este incremento foi do 1,78 por cento. En
relación ao mesmo mes do ano anterior, o paro baixou en Galicia nun 9
por cento, con 24.181 desempregados menos.
De
novo, un mes máis, detéctase unha importante contracción na poboación
en idade de traballar pola saída cara fóra e o retorno de inmigrantes
cara o seu país de orixe. De feito, continúa rexistrándose a caída do
desemprego entre a poboación estranxeira.
Por
sexos, no mes, o desemprego medra nun 2,74 por cento entre os homes e
nun 2,2 por cento entre as mulleres. En termos interanuais baixa nun
11,21 por cento entre os homes e o 6,99 por cento entre as mulleres.
Provincialmente,
na Coruña o desemprego medra nun 1,6 por cento, o 2,6 por cento en
Pontevedra, o 3,97 por cento en Lugo, e o 3,72 por cento en Ourense. En
relación a hai un ano o paro baixa en todas, o 10,85 por cento en Lugo, o
9,32 por cento na Coruña, o 9,01 por cento en Ourense e o 8,3 por cento
en Pontevedra.
Entre
os menores de 25 anos o desemprego afecta en Galicia a 13.524 persoas, o
que supón unha baixada do 2,7 por cento e, nada menos, que do 20,47 por
cento en relación a hai un ano. UGT-Galicia considera que a saída de
efectivos cara desta Autonomía na busca de emprego e dun futuro mellor
está detrás desta realidade estatística.
Por
sectores o paro increméntase en servizos, o 3,69 por cento, o que supón
o 92,24 por cento do total do aumento do paro. Interanualmente cae en
todos os sectores, con máis contundencia na construción e na industria.
A
contratación diminúe o 2,72 por cento no mes, mentres no resto do
Estado medra un 4,14 por cento. A contratación indefinida medra nun 7,83
por cento e cae e temporal nun 3,61 por cento. A porcentaxe de
contratos indefinidos sobre o total é no mes de outubro en Galicia do
8,42 por cento.
Para
UGT-Galicia, resultan realmente preocupantes, case que alarmantes, os
niveis de cobertura por desemprego que continúan baixando. Sendo de
122.330 persoas, baixando nun mes en 2.062, o que supón unha taxa do
56,22 por cento. Cando hai un ano esta era do 60,2 por cento.
Pero
é que cada vez son máis os que xa non teñen dereito a percibir unha
prestación contributiva, pola cronificación do desemprego, e pasan a
cobrar un subsididio ou renda activa de inserción, con contías moi
limitadas e que fan difícil que as familias afectadas poidan chegar a
fin de mes. Pero é que non se pode esquecer que hai un 116.000
desempregados que non cobran nada. Neste caso o risco de exclusión
social é máis que evidente.
Outro
dato especialmente negativo é a media de afiliados á Seguridade Social,
que empeora no mes, ao contrario do que sucede no resto do Estado. En
Galicia hai 3.909 afiliados menos. Resulta moi preocupante que haxa tan
só 932.760 afiliados nesta Autonomía. Este é un indicador moi
significativo de que a situación, en termos de emprego, non remonta.