17. OUTUBRO. A RIQUEZA DÚNS POUCOS É POBREZA PARA MOITOS. NON A POBREZA.

O Día Internacional para a Erradicación da Pobreza, que se conmemora o 17 de outubro, cobra máis sentido que nunca, xa que a pobreza e desigualdade agraváronse nos últimos anos de forma cada vez máis extrema, intensa e crónica.

17 de outubro, Día Internacional para a Erradicación da Pobreza

 

UGT-Galicia considera que é sumamente urxente cambiar este sistema, que xera riqueza para uns poucos e un empobrecemento xeneralizado para o resto da poboación, e poñer freo ás políticas, locais, estatais ou globais que profundizan na desigualdade e o sufrimento das persoas.

As políticas públicas sociais como a Sanidade, Pensións, Educación, Cooperación, Servizos Sociais, Igualdade, Dependencia, entre outras, deben ser o espello dun reparto máis equilibrado da riqueza e doutra política redistributiva do estado que preserve os dereitos da cidadanía, mínimos vitais para a igualdade de oportunidades e a protección das persoas.

Os datos reflicten unha realidade cada vez máis preocupante no ámbito internacional: a pobreza afecta a 120 millóns de persoas na UE, 1.400 millóns sofren pobreza extrema no mundo e case 1.000 millóns sofren fame e non teñen acceso ao auga potable e outros servizos básicos como a saúde e a educación. Así mesmo, a desigualdade tamén vai en aumento. O último informe de Desenvolvemento Humano do PNUD revela que as 85 persoas máis adiñeiradas do mundo acaparan a mesma riqueza que as 3.500 millóns máis pobres, a metade dos habitantes do planeta.

En España e en Galicia todos os indicadores amosan un incremento da desigualdade e da pobreza. España ostenta o vergonzoso segundo posto en Europa no que a desigualdade se refire e en Galicia, con datos de 2013, case o 18 por cento dos fogares están en risco de pobreza. É imperativo poñer freo ás políticas locais, estatais e globais, que polarizan a sociedade e violan os dereitos das persoas. Os Orzamentos Xerais do Estado para 2015, denominados polo Ministro de Facenda como os "orzamentos da consolidación da democracia" non fan senón incidir no aumento da pobreza, na consolidación da desigualdade e seguen vulnerando os dereitos humanos sociais, culturais e económicos da cidadanía, tanto dentro como fóra das nosas fronteiras.

Existen solucións reais e factibles. Facemos nosas as reivindicacións da Alianza Española contra a Pobreza e a Cumbre Social, das que UGT forma parte e queremos un compromiso real a través da participación e mobilización colectiva, co fin de:

- Acabar coa economía especulativa e ter unha economía ao servizo das persoas.

- Potenciar alternativas que permitan á natureza rexenerarse e a todas as persoas manter unha boa calidade de vida.

- Desenvolver servizos públicos, de calidade e universais para que todas as persoas teñan unha vida digna.

- Crecer para vivir dígnamente e non para a acumulación de riqueza e o consumo irracional.

- Deixar atrás o individualismo e a competitividade e cambialos pola cooperación e a solidariedade entre as persoas e os pobos.

- Recoñecemento do valor e fomento da paz como ben intanxible para persoas, pobos e coa natureza.

Estas son as nosas reivindicacións políticas para conseguir este cambio:

- Unha fiscalidade xusta e equitativa, con un sistema tributario e un gasto público que redistribúan a riqueza e combatan as desigualdades, investindo nos servizos públicos, a protección social e a promoción do emprego decente co fin último de loitar contra a pobreza e a exclusión, e garantir a xustiza e a cohesión sociais dos nosos barrios, pobos e cidades.

- Políticas e orzamentos cuxo eixe principal sexa a loita contra a pobreza e a desigualdade, e a garantía duns servizos sociais básicos de calidade.

- É necesario crear mecanismos internacionais que poidan mellorar e ampliar os marcos teóricos e científicos cos que se toman as decisións políticas globais no contexto da nova axenda. Desde a Alianza, propoñemos a creación dun Panel Internacional para Erradicar a Pobreza e a Desigualdade que asuma, xunto a outras institucións, esta función.

- Transparencia e rendición de contas nestas e todas as medidas que poidan ter consecuencias en materia do goce de todos os dereitos humanos.

- Queremos que o Estado cumpra co seu compromiso de lograr o 0,7% de Axuda Oficial ao Desenvolvemento/Renda Nacional Bruta de acordo cos compromisos internacionais adquiridos. A crise económica non debería ser causa dunha regresión respecto á porcentaxe da Renda Nacional Bruta dedicada á cooperación internacional.

- O goberno español e os gobernos autonómicos e locais han de cumprir coas súas obrigacións en materia de dereitos humanos, sen esquecerse de que estes son civís, políticos, económicos, sociais, culturais, laborais, medioambientais, de xénero, e que conlevan obrigacións aquí e máis aló das súas propias fronteiras.

- É imprescindible apuntar cara á completa erradicación dos paraísos fiscais. A curto prazo é imperativo actuar decididamente contra a impunidade e a opacidade.

- É necesario que se implante o Imposto sobre as Transaccións Financeiras e aplíquese na súa totalidade, incluíndo a compravenda de accións, bonos e derivados, e que o seu recadación sexa destinada ás políticas sociais, á cooperación ao desenvolvemento e á protección do medio ambiente.

- É necesario frear o avance desmedido da desregulación dos mercados, polos efectos que isto pode ter no mundo enteiro aumentando as desigualdades e a pobreza. É necesario que se free o Tratado Transatlántico de Investimentos entre Estados Unidos e a Unión Europea que se está elaborando ás costas da cidadanía.